Pandemiaren etenaldiaren ostean, bueltan dago berriz Ugarteko Futbito Torneoa. Maiatzaren 25era arte egongo da izena emateko epea, eta 30ean hasiko dira norgehiagokak. Bost kategoria egongo dira guztira: Alebinak, Infantilak, Kadeteak, Jubenilak eta Seniorrak. Kategoria bakoitzean izena ematen duen talde kopurua jakin ondoren osatuko dira partiden egutegiak, antolatzaileek jakinarazi dutenez.
Izena emateko Patxirekin harremanetan jarri behar da, 646138849 telefonoaren bidez. Ugarteko kioskoko langilea da Patxi, eta bera arduratu da azken urteetan txapelketa antolatzeaz, beste hainbat bizilagunen laguntzarekin.
Talde bakoitzak kuota bat ordaindu beharko du, balizko istripuentzako asegurua ordaintzeko. Hauek dira kuoten zenbatekoak kategorioaren arabera:
- Alebinak: 80 euro
- Infantilak: 80 euro
- Kadeteak: 100 euro
- Jubenilak: 130 euro
- Seniorrak: 160 euro
Ia 40 urteko historia
Laudioko kirol proba mitikoenetako bat da Ugarteko Futbito Txapelketa. 1984. urtean du jatorria. Ugarteko San Inazio kuadrillak antolatu zuen lehenbiziko aldiz. 1987. urtean utzi zitzaion antolatzeari, harik eta 1992an auzoko bi bizilagunek (Tino eta Kikok) ekimena euren gain hartu zuten arte. Ordutik hona ospe eta garrantzia nabarmena hartu du probak. Ellakuriko igerilekuak gertu daudela baliatuta, gazte asko bertaratzen dira norgehiagokak ikustera.