SORGINLARREN

"Buruhandiak tartean egonda seguru ez direla irribarreak faltako, animatu tailerrean parte hartzera"

Maiatzaren 21ean izango da Sorginlarrenek antolatutako buruhandi tailerra. / Sorginlarren

Maiatzaren 21ean buruhandiak sortzeko ikastaroa egingo du Sorginlarrenek. 17:00etatik 19:30era izango da ikastaroa Gardeako eskola zaharrean. Ander Fernandez taldeko kideak azaldu ditu ekimenaren xehetasunak.

Maiatzaren 21ean -hurrengo larunbatean- egingo dute 2022ko Erraldoiketaren lehen ekintza. "Erraldoiketaren helburuak nahiko argiak dira: erraldoi, buruhandi eta izaki mitologikoak mugitzen dituzten taldeekin topaketa antolatu nahi dugu, eta gure arteko saretzea egitea", adierazi du Ander Fernandez Sorginlarren taldeko kideak. Abuztuan izango da ekitaldi hori, baina dagoeneko ekin diote bestelako jarduerak antolatzeari. 

Familientzat buruhandi tailerra

Hain zuzen, finantzaketa lortze aldera, buruhandi tailerrak antolatuko dituzte Sorginlarren taldekoek. Hilaren 21ean izango da hori, Gardeako eskola zaharrean.

"Familian egitea buruhandia -haur eta heldu baten artean- da ideia, elkarlanean. Bakoitzak bere buruhandia eramango du gero"

"Nahiko errazak dira egiteko, eta gainera haurrek ere sortu ditzakete, prozedura ez delako hain konplexua. Familian egitea -haur eta heldu baten artean- da ideia, elkarlanean. Bakoitzak bere buruhandia eramango du gero", azpimarratu du. Ikastaroak 20€ balioko ditu, eta material guztia egongo da barne hartuta. Ekimena 6 urtetik gorako umeei zuzendua dago, heldu batekin bertaratu beharko badira ere. Partaideak, beraz, bikoteak izateko eskatu dute: haurra eta heldua. Buruhandia sortu ez ezik, kalejiran ateratzeko aukera izango dute:  "Erraldoiketa egunean kalejiraren irekieran edo buruan joateko gonbita luzatuko diegu". Jendeari parte hartzeko mezua zabaldu diote: "Buruhandiak tartean -eta etxean egonda- egonda seguru ez direla irribarreak faltako, animatu eta parte hartu!". 

Abuztuan, 'Erraldoiketa'

"Abuztuko topaketa handiagoa izatea nahi dugu, eta auzolana izatea ardatz", erantsi du Fernandezek. Lehenbiziko edizioa gogoan du oraindik: "Guk ez genuen espektatiba handirik, eta jendea oso pozik geratu zen". Egunean zehar 2 kalejira eta erraldoien dantzaldia egin zituzten, Euskal Herriko erraldoi eta buruhandi anitzekin: "Oso koloretsu geratu zen. Nolabait egiten genuena plazaratu genuen, eta horrekin jarraitzea da asmoa". Bigarren edizioa xumeagoa izan zen, Fernandezen hitzetan, baina lehengoari eutsi nahi diote. Taldeak lotzen dabiltza dagoeneko: "Harremanak eginda ditugu, eta jendeak interesa agertu du". Data oraindik ez dute itxita, baina abuztuan eta Laudioko jaietan izango dela ziurtatu dute.

Ekainean aurreikusi dute erraldoiketaren aurkezpena, baina ez dute ekintza gehiago antolatzea baztertzen, "eskualdeko beste buruhandi batzuekin hitz egin eta Erraldoiketa txikiren bat egitea beste herriren batean ere badugu buruan". Horrez gain, buruhandi txiki baten zozketa egingo dute Laudioko Sanpedropeko festetan.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide