Ander Añibarro alkateak eta Ander Larrinaga alkateordeak prentsaurrea egin dute gaur iragartzeko Hiri Antolamendurako Plan Orokor berria osatzeko makineria abian jarri dela. Izan ere, gaur talde erredaktorearen kontrataziorako esleipena onartu dute, 420.000 euroren truke. Lau urteko lana izango da eta tokiko erakundeak exijituko dio enpresari diziplina anitzeko taldea: ingeniaritzan, zuzenbidean, arkitekturan, ingurumenean edota generoan aditua.
2027-2031 legealdian onartuko den dokumentua
Dena den, egungo udal gobernu taldeak argi eta garbi utzi du litekeena dela HAPO berria 2027-2031 legealdian onartzea. "Urrats ugari eman behar dira; hasierako onarpena, sektoreko txosten teknikoak, behin behineko onarpena eta behin betikoa ere. Horretarako guztirako adostasuna beharrezkoa izango da alderdien zein herritarren artean. Horregatik, parte hartze prozesua ere egingo dugu" nabarmendu du Larrinagak.
"Legealdi hau urtebetean amaituko da eta hurrengoan oraindik landu beharko da gaia. Ondorioz, litekeena da 2027-2031 legealdian onartzea behin betiko plana. Horregatik, hain zuzen, ezinbestekoa izango da etorkizunera begira jartzea" erantsi du alkateak.
Laudioko garapena definituko duen testua
Ander Larrinagak azpimarratu nahi izan du HAPOren garrantzia: "Ez da soilik erabakitzea non eraikiko den. Hautatu behar da zein herri eredu nahi dugun: 15.000 biztanlekoa edo 20.000koa, industriala, naturgune babestuekin... Definituko da udalerria non garatuko den eta zein norabidean".
Hori dela medio, alkateordeak uste du prozesuak ematen duen testuak 30 urte baino gehiago iraun behar duela. "Egun indarrean dagoen HAPOa aspaldi iraungi zen. 1980ko hamarkadan hasi zuten bere eztabaida, 1993an onartu zen eta 1995ean sartu zen indarrean. Garai horietan bogan zeuden ideien isla da testua. Etorkizunerako begirada zabalagoarekin lan egin behar dugu honetan, ez da posible 30 urtetan zaharkituta geratzea".
Hain zuzen, hori nabaritzen da hiri-antolamendutik kanpo geratu diren zenbait eraikuntzetan. "Garai horietan garapen izugarria egongo zela uste zuten, baina orain errealistagoak izan behar dugu. Berez, uste dut hiri-antolamendutik kanpo geratu ziren eraikin askok aukera izango dutela barruan egoteko", adierazi du Larrinagak.
Adostasun politikoa
Ezinbestekoa izango den beste osagai bat da alderdien arteko adostasuna. Berez, Jon Karla Menoyoren udal gobernu taldeak HAPO berria onartzeko saiakera egin zuen 2010ean, baina oposizioko taldeek ez zuten bat egin egitasmoarekin eta bertan behera geratu zen. Hortaz, hurrengo urteetan gauza bera ez gertatzeko, ordezkariek negoziatu beharko dute.