Gorobel Crossfitek bere III. urteurrena ospatuko du laster eta horretarako elkartasun ekimena egingo du maiatzaren 21ean. Zehazki, 09:00etatik 15:00ak arte euskal crossfit boxen arteko txapelketa izango da.
Horrez gain, Golden Covers taldeak kontzertua eskainiko du eta txosna eta zozketa ere egongo dira. Tiketak erosteko 667 521 542 telefonora deitu ahal da. Gaur bertan barne txapelketa egin dute.
Ideia gimnasioaren bezero batek izan zuen. Izan ere, ataxia telangiectasia duten umeen aulki gurpildunak bultzatzen ditu maratoietan, kirol probetan parte har dezaten. Gauzak hala, elkartasun ekimenera batzea proposatu zien Gorobel Crossfiteko kideei.
Gaixotasun arraro horren alde hainbat ekintza sustatu dira eskualdean, batzuk kirolari lotuta eta beste batzuk jaiari. Ataxia telangiectasiari aurre egiteko ez da tratamendurik existitzen eta jatorri genetikoa du. Bere eraginaren ondorioz, gainbehera fisiko handia pairatzen dute gaixoek berehala eta bederatzi urterekin aulki gurpilduna erabiltzeko beharra dute. AEFAT elkartera bideratuko dute lortutako dirua, hainbat aldiz egin den moduan.