Ingelera eta tenisa uztartuko ditu, besteak beste, Laudioko Udako tenis kanpusak. Udalekuen izena V. Tenis Summer Camp da: "Helburua kirola eta tenisa Laudion eta Aiaraldean sustatzea da. Tenisa frogatzeko aukera bikaina da, urtean zehar zailagoa baita eskolan parte hartzea, topera gaudelako. Beraz, tenisaren inguruan galdetzen duten neska mutilentzako aukera oso ona da udan tenis udalekuetan parte hartzea".
Andoni Agirretxe Laudioko Tenis klubeko kidea ari da prestaketetan, batik bat. Bosgarren aldia da ekimena antolatuko dutena, eta parte hartzea "goranzkoa da", erantsi duenez: "Aurreko urtean plaza guztiak bete ziren zenbait asteetan". Partaide kopurua mugatua da, eta horregatik 5 txanda aurreikusi dituzte, ekainaren 27an hasiko dira, eta uztailaren 29an bukatuko dute.
Tenisa eta ingelera ardatz
Tenisa eta ingelera dira ekimenaren osagai nagusiak. "Txandakako kanpusa da, non haurrek tenisa edo mini-tenisa egiten duten, adinaren arabera", zehaztu du. Hala ere, beste kirol batzuk ere frogatzen dituzte. Ariketen artean daude ginkanak, ur jarduerak eta abar. "Ondoren, ingelerako klasea ematen da modu ludiko batean. Beraz, esan genezake tenisa eta hizkuntzak direla kanpusaren ardatza. Dena den, hizkuntza jariokorra euskara denez, kanpusa hirueleduna da".
Agirretxeren ustetan, oso aukera ona da tenisarekin lehen kontaktua izateko. "Esango nizueke haurren eta irakasleen artean sortzen den familia giroa bakarra eta oso berezia dela. Haur guztiek urteetan zehar errepikatzen dute, harreman hurbilaren eta ikaskuntza esanguratsuaren aldeko apustua egiten baititugu".
Interesdunek laudiotenis.com webgunean eman behar dute izena, eta izen-emate fitxa campuslaudiotenis@gmail.com helbidera bidali beharko dute ondoren. Izen emate ordena baliatuko dute parte hartze onarpena berresteko.
