Alonsotegiko Munabi Kirol Klubak ekitaldia deitu du biharko. 18:30ean hasiko da herriko udal liburutegian eta helburu bikoitza izango du. Alde batetik, Itxaso Escondrillas atleta laudioarraren lorpenak goraipatuko dituzte. Izan ere, Escondrillas Europako txapeldunordea izan da aurten 1.500 metroko proban, Master kategorian.
Javi Muñoz Munabiko presidenteak azaldu du omenaldi horrekin aitortu nahi dutela lasterkariaren ibilbide luzea kirolaren esparruan. Horrez gain, balioa eman nahi diote Portugalen eskuratutako azken dominari, amatasunarekin uztartu baitu Escondrillasek, "horrek dakarren guztiarekin", adierazi du Muñozek.
Laudioarrak ez ezik, Sandra Sevillano Guerra bizkaitarrak ere jasoko du aitortza. Izan ere, emakumezko hori Europako Ultra Sky txapelduna izan zen iaz. Horren ostean, Alonsotegiko Herri Krosa aurkeztuko dute. Berez, lasterketaren zein omenaldiaren sustatzailea Javier Muñoz izan da, duela urte batzuk Laudio Atletismo Klubaren presidente izandakoa. Begoña Beristain kazetariak egingo du ekitaldiaren aurkezpena.
