Nagusitasun osoz irabazi zuen Ane Aldayturrigak asteburuan Bizkaiko Txapelketako 3.000 metroko oztopo-lasterketa. Aldayturriaga Laudio Atletismo Klubeko kidea da, Bilbon bizi arren: "Laudiokoa naiz, baina ama eta biok Bilbora etorri ginen bizitzera duela urte batzuk. Hala ere, Laudioko taldean nabil eta Ellakurin entrenatzen dut", argitu du atletak.
Berez, lasterkariak lehenengo aldiz parte hartu zuen asteburuan diziplina horretan: "Orain arte krosean eta 1.500 metroko probetan lehiatu naiz. Esaterako, Euskadiko 7. sailkatu nintzen pandemia baino lehen krosean".
Hala eta guztiz ere, Aldayturriagak argi zuen irabazteko aukera handia zuela larunbatean, kategoria absolutuan, gainera. Izan ere, bere markarekin ez dago oso pozik laudioarra: "Nire marka ez da onena izan, 13:30. Lasterketako erritmoa oso motela izan zen nire gusturako, eta horren ondorioz ia erori nintzen. Bigarren kilometrotik aurrera erritmoa bizkortu nuen eta beste guztiak atzean utzi nituen. Inork ez ninduen jarraitu eta hori nabaritzen da".
Garaipenaren ostean, Euskadiko Txapelketan arituko da asteburu honetan. Hitzordu horretan ez dauka garbi irabazteko aukerarik ote duen: "Ez dakit nork parte hartuko duen, ezta zein markak egiten dituzten. Hortaz, podiumean banago, nahikoa. Horrez gain, nire helburua da marka hobetzea eta Espainiako Txapelketan lehiatzeko eskubidea izatea horri esker".