Ekainaren 24an San Mames Barriak lehenengo aldiz hartuko ditu Athletic Clubeko presidente izateko hauteskundeak. Hautagaien artean Ricardo Barkala egongo da. Hedabideetan gehien agertu den presidentegaia Bilboko Portuaren Agintaritzako burua da eta aurretik EAJko alkateordea izan da Bilboko Udalean, eta baita Eusko Jaurlaritzako Lan eta Gizarte Politiken Sailburuordea ere.
Bihar Laudioko Kultura Etxea bisitatuko du 19:30ean, Athletic Clubeko zale eta bazkideekin solasaldia izateko. Izan ere, bere hautagaitzak, Geuria-k, abalak jasotzeari ekin dio, hori baita lehenengo urratsa futbol erakundearen gidaritza eskuratzeko.
Zentzu horretan, bulegoa ireki du zerrendaburuak Bilbon eta zenbait ekitaldi antolatu ditu bere hautagaitza sustatzeko. Barkalak ez du zehaztasun gehiegirik eskaini momentuz bere proiektuari buruz, hortaz, aukera izango dute jarraitzaile zurigorriek galderak zuzenean egiteko. Nabarmentzekoa da orain arte izandako agerraldi guztiak Bizkaian egin dituela (Bilbo, Bermeo, Getxo eta Basauri) eta Laudion gauzatuko duela Arabako bere lehenengo hauteskunde egitasmoa.