APILL elkarteak berriki amaitu du Bermutaren I. Ibilbidea, Haitzulo Barriren garaipenarekin, gainera. Atsedena hartzeko tarterik gabe, Laudiok beste ekimen bat izango du gaur eta bihar: Junifesta. Oktoberfest alemaniarraren arima herrira ekarrita, 24 tabernek garagardo bereziak eskainiko dituzte eta beste batzuek, gainera, errezeta alemaniarrak prestatuko dituzte.
Garagardoaren ibilbidean parte hartzen dutenen artean zozkatuko dituzte Municheko Oktoberfestera joateko bi bidaia, bisita gidatuak La Salve eta Laugar Brewery garagardo fabriketara eta garagardo sortak. Horretan parte hartzeko ibilbidearen orria bete eta APILLeko egoitzan utzi behar da.
Bestalde, garagardoak dastatzen dutenen artean bisitak eta edari sortak irabazteko aukera ere egongo da. Horretarako, tiketa Laudio Berrikusi app-era igo beharko dute.
Laudio On
Horrez gain, APILLek Laudio On kanpaina abiatuko du abuztuaren 31ra arte. Tarte horretan, herrian elkarteko bazkide diren dendetan 10 euro edo gehiagoko erosketak egiten dutenek aukera izango dute horien tiketak Laudio Berrikusi aplikaziora igotzeko. Sariak, guztira, 6.400 eurokoak izango dira eta garrantzitsuena izango da 2.000 eurokoa. Irabazleak diru hori gastatu ahalko du hautatzen dituen establezimenduetan irailaren 15ean.