Egitarau oparoa aurkeztu du Laudioko Orbeko Etxeak 21. urtemuga ospatzeko. Urtero gisa, ekainean programazio berezia egingo dute Gardeako etxe okupatuan, nahi duen ororentzat. Gaur ekingo diote jaiari, 19:30ean kontzertuak egongo baitira Irreal, Tenso, Reclusion eta Cuero taldeen eskutik. Hala ere, larunbat eta igandean -hots, ekainaren 11n eta 12an- izango dira jarduera gehienak.
Bi asteburutan luzatuko da 21. urtemuga festa. Ekainaren 11n izango da jai egun nagusia, baina igandean Haurren Eguna ospatuko dute, besteak beste
Asteburu borobila zain
Asteburu luzea dute aurretik Orbeko Etxean. Larunbatean, 8:30ean Jesuri aske! lemapean mendi ibilaldia deitu dute, Orbeko Etxetik Elorritxugane, Jesuri eta Peña Negra tontorrak lotzeko. Luiaondora jaitsiko dira oinez gero, eta bertan bukatuko dute txangoa.
Eguerdiko 13:30ean, berriz, trikipoteoa egingo dute herrigunetik, 15:00etan herri bazkariarekin indarberritzeko. Arratsa, ostera, "muturreko olinpiadekin" gozatuko dute.
Igandean, aldiz, Haurren Eguna izango da nagusi. 17:00etan irekiko dituzte Orbeko Etxeko ateak, eta lorategian ur jolasak eta ipuinak egongo dira. Horrez gain, bulderrean eskalada tailerra egingo dute.
Bigarren txanpa ekainaren 15etik 18ra gauzatuko dute. Asteazkenean -hilak 15- El futuro de la mistelera liburu aurkezpena antolatu dute , eta ostegunean Igor Arzuagaren De espantapajaros y escarcha olerki liburuaren solasaldia zein pikoteoa. Ostirala, ordea, "Jedi galaktikoarekin" girotuko dute, DJ Kultura Subsueloren gidaritzapean.
Ekainaren 18an bukatuko dute 21. urtemugaren ospakizun zikloa. Goizean pentsiodunen ibilaldiarekin bat egingo dute, eta 16:00etan dokumentalak azpititulatzeko tailerra izango dute osagai. Iluntzean, baina, musika festibalak lehertuko du festa: Rotura, Nafra, Addenda, Shöck eta Troika taldeak oholtzaratuko dira.
Orbeko Etxeko kideek jakinarazi dutenez, urteurrenean zehar Kakitzaten erakusketa egongo da ikusgai espazioan, NATOren aurkako lana hain zuzen.