"Problematika sozialak aztertzen jarri ginela, osasun mentalak duen tabu karga handiaz eta garrantzi txikiaz ohartu gara. Egoera zein zen ikusita, honi aurre egiteko ekintza baten prestaketan murgildu gara. Buru osasunari beharrezko garrantzia eman eta duen estigmatizazioa kenduko dion ekitaldia izango da". Hala laburtu dute 'Taburu' ekimenaren sustatzaileek gaur Bilbon antolatutako jarduera. Arratsaldetik iluntzera luzatuko da programa, 16:00etan hasita, BBK Kuna aretoan.
"Ez dugu buru osasun ona, ez dakigu krisiak kudeatzen, ezegonkortasun betean bizi gara, eta horrek antsietatea sortzen du. Are, gazteen artean, gizartearen zama osoa sorbaldan baitaramagu, eta gainera infantilizatu egiten gaituzte"
Haizea Urkixo Gorostiaga da ekimenaren atzean dagoen gazteetako bat, beste 24 ikaskiderekin batera. "Urte amaieran beti jartzen dugu proiekturen bat martxan. Guztiok hurbiletik sentitu dugu nozbait buru osasunaren beharra, lagun zein familiarengandik", erantsi du, "gizarte kapitalistaren problematika da, eta beharrezkoa da lantzea, ez dugu buru osasun ona, ez dakigu krisiak kudeatzen eta ezegonkortasun betean bizi gara, eta horrek antsietatea sortzen du. Are, gazteen artean, gizartearen zama osoa sorbaldan baitaramagu, eta infantilizatu egiten gaituzte gainera".
Ekitaldian arteak izango du tokia, baita ikus-entzunezkoek ere. "Sentsazioak sortzen dituzten gauzak nahi genituen plazaratu. Bizitegi eta Argia fundazioekin elkarlanean aritu gara, eta ohartu ginen eurekin antzezlana prestatzea oso egokia zela euren gaixotasunaren azalean jartzeko, eta esperientzia gisa aberasteko". Hala, Bizitegiren antzerkia taularatuko dute 19:30ean: "Gaixotasun mentala duenaren bizitza, erreakzioak, sentimenduak... ikustarazi nahi ditugu performancearen bidez. Jendearen gorputzean transmititu nahi dugu hori dena, aktoreak ez garen arren ondo geratuko dela uste dut".
Ekitaldiak kontzientziazioa du ardatz, baina helburua harago doa: "Datozen denek kontzientziazioa badute, baina jendeak elkar ezagutu eta hitz egitea nahi dugu. Espazio seguruak nola sortu eta kudeatu eta abar ere eztabaidatuko dugu azken zatian. Kontzientzia enpatikoagoa sortu nahi dugu, arazo bati hitzak jarri, eta elkarrekin saretu zein hitz egin".
6 euro balio dute sarrerek, baina agortuta daude dagoeneko: