Bi urteko etenaldiaren ostean, datorren astean ospatuko dira San Joan Astobitzako jaiak, Laudioko izen bereko baselizaren inguruetan. Aurreko urteetan baino egitarau xumeagoa prestatu dute antolatzaileek, ekainaren 23an -osteguna- pilatuko baitituzte ekintza guztiak.
18:30ean hasiko da giroa Larrazabal auzoan. Kirikiño aisialdi taldeak umeentzat jolasak egingo ditu, eta Galtzagorri kultur elkarteko kideak buruhandiekin igoko dira zelaira. 22:00etan piztuko dute udari ongi-etorria egiteko sua, eta Akelarre dantza taldearen erakustaldia egongo da jarraian. Erruki erromeria arduratuko da gaua girotzeaz, 22:30etik aurrera.
Jaiak egun bakarrera mugatzearen arrazoiak azaldu dituzte antolatzaileek. Pandemiaren ostean jai batzordea jende aldetik nahiko ahul geratu dela aitortu dute. "Horregatik erabaki dugu aurtengo jaiak 22ko gauera mugatzea, jendea erre ez dadin, eta jai batzordea apurka-apurka indartzen joan dadin". Hala ere, ohiko edari eta janari eskaintza mantendu dutela gaineratu dute.
Horri lotuta, jaiak "auzolanean" antolatzen dituztela nabarmendu dute. Horregatik, garrantzitsutzat jo dute jai batzordera jende gehiago batzea, hurrengo urtean ohiko formatua berreskuratu ahal izateko. Posta elektroniko helbide bat jarri dute, jaien antolakuntzan parte hartu nahi duen ororen eskura: sanjoanastobitzakojaiak@gmail.com.