Denboraldia agurtu zuten atzo Lautxirrinkako kideek. Erakustaldia eskaini zuten horretarako Laudioko Granja kiroldegiko kantxetan, eta hainbat guraso eta herritar bertaratu ziren haur eta gazteek azken hilabeteetan ikasitakoaz gozatzera.
Irristaketa klubeko kideek positiboki baloratu dute aurtengo denboraldia, baina gaineratu dute “aldaketa nabarmenak” bizi izan dituztela. “Otsailetik entrenatzaile titularra gabe egon dira patinatzaileak eta zuzendaritza batzordean ere aldaketa egon da”, azaldu dute.
Horrez gain, denboradi honetan ekin diote irristatzaileek Granja kiroldegian entrenatzeari. Horretarako, kiroldegian libre zeuden ordu asko erabili behar izan dituzte, “baita igandeetan ere”. Gauzak hala, “talde lan handia” egin dutela nabarmendu dute klubeko kideek. “Horren ondorioz, irristatzaileak maila igoerak lortu eta parte hartu izan duten lehiketetan garaipen batzuk lortu dituzte, Torrelavegan eta Bilbon kasu”. Hala ere, taldeko kideek nabarmendu dute gozatu ere egin dutela, eta hori dela garrantzitsuena: “agerian geratu da talde bat osatzen dugula”.
Argazkiak: Lautxirrinka Irristaketa Kluba