Emaitza bikainekin, baina zapore gazi-gozoarekin itzuli da Itxaso Escondrillas Tenerifetik. Lasterkari laudioarrak zilarrezko domina irabazi zuen 1.500 metroko proban eta laugarren postua erdietsi zuen Espainiako Atletismo Txapelketan Master Kategorian, larunbatean eta igandean, hurrenez hurren.
Eguraldia dela medio -hau da, beroa-, 1.500 metroko lasterketa gauez lehiatu zen larunbatean. Proba erritmo lasaiarekin hasi zen eta bat-batean aldaketa bortitza gertatu zen. Escondrillasek eutsi zion horri eta buruan jarri zen, baina azken metroetan ezin izan zuen garaipena lortu. Laudioarrak aitortu dio Aiaraldea Komunikabideari bere helburua irabaztea zela.
"Nire asmoa irabaztea zen"
Hurrengo egunean, igandean, 800 metroko proba zen eta Aiaraldeko atletak handicap handiarekin abiatu zuen: "1.500 metroko lasterketa gauez izan zen eta ez nuen ondo lo egitea lortu. Horrez gain, beroaren ondorioz, 800 metrokoa goizean goiz izan zen eta nire gorputza ez zen guztiz osatu".
Gauzak horrela, lasterketa erritmo ez oso altuan hasi zen eta 300 metro egin eta gero bizkortu zen. Orduan nabaritu zuen kirolariak atseden falta: "Nik gogokoen dudan zatia da azken 100 metroena eta justu hor sumatu nuen ez nuela indarrik lehiatzeko. Azkenean, laugarren postuan sartu nintzen helmugan".
Larunbatean gauez lehiatu ostean, igandeko lehen orduetan izan zuen bigarren lasterketa laudioarrak eta atseden falta nabaritu zuen
Asteburua igaro ostean, Escondrillas pozik dago lortutakoarekin, baina unean bertan ez zen horrela izan: "Serio entrenatu dut eta espero nuen irabaztea, baina besteek ere entrenatzen dute. Gainera, nire alaba ez zen etorri, bidaia oso luzea delako, eta hori ere faltan bota dut. Dena den, dominak eskuratzea oso zaila da eta sari hori jasotzeak esan nahi du ondo lan egiten ari naizela".