Gaur 11:00etan ekin dio Laudioko Udal Gobernu Taldeak herriko turismo bulego berria inauguratzeari. Andoni Orue zinegotziak, Ander Larrinaga alkateordeak eta Ana Telletxea Laudio Haziko arduradunak hartu dute parte ekimenean azaltzeko toki berriaren funtzionamendua eta helburuak. Oruek argitu du Udalak eskerrak eman nahi dizkiola laudioar bati, berak laga baitu kioskoa izandako azpiegitura.
Baliabide berri horren helburua izango da herriko eskaintza turistikoa dinamizatu eta sendotzea. Horrela, Laudioko Udalak ezagutzera eman ahal izango ditu udalerriko ondare historikoa eta naturala (Eraztun Berdea, Ermualde, Lamuza Parkea, ermitak...).
“Turismo Bulego horren bitartez, beste bulego batzuekin aliantzak egingo dira, bisitariak batera erakartzeko eta lurraldeak batera saltzeko. Turismo arloko epe ertaineko estrategia abian jartzeko lehen urratsa da, eta Laudio txangozaletasun naturaleko eta kulturaleko funtsezko puntu gisa kokatu nahi dugu”, zehaztu du Andoni Orue Ekonomiaren Garapen, Merkataritza eta Enpleguko zinegotziak.
Ordutegiak eta webgunea
'Topa!Laudio' izeneko informazio gune berri hori urte osoan egongo da zabalik. Udan, bulegoa asteazkenetik astelehenera egongo da irekita, 9:00etatik 14:00etara, baita zubietan eta egun berezietan ere.
Goi-denboralditik kanpo, zerbitzua ostiraletik igandera egongo da herritarren eskura, ordutegi berean. Gainera, arreta turistikoa emango da 944 034 930 telefono-zenbakian, baita posta elektronikoaren bitartez ere (topa@laudio.eus).
Zerbitzua osatzeko, Udalak turismo-webgune berria (www.topalaudio.eus) eta sare sozial espezifikoak jarri ditu martxan. Horrela, udalerriko eskaintza ezagutu ahal izango dute Laudio eta bere ingurua bisitatu nahi dutenek.