Laudioko jai kuadrillek Indarberrituta ospatuko dituzte San Pedropekoak. Bi urteko etenaren ostean, egun osoko egitaraua prestatu du Jaiak Koordinakundeak datorren uztailaren 2rako. Aurtengoan, Aldai Plazan bilduko dute egitarauaren zatirik handiena.
Sukalki txapelketak emango dio hasiera jai egunari: kuadrillek 9:00etan piztuko dituzte suak eta 13:30etan entregatu beharko dituzte lapikoak. 11:00etan erraldoi eta buruhandien kalejira abiatuko da Herriko Plazatik, Galtzagorri Kultur Taldeak antolatuta. 12:00etan, aldiz, Kirikiñok haurrentzako jolasak atonduko ditu Aldai Plazako aterpean.
Epaimahaiak sukalki txapelketako irabazlea iragarri ostean, bazkari herrikoia egingo dute parte hartzaile guztiek batera, 14:00etan, eta bingoak girotuko du bazkalostea.
Arratsaldean ekintza gehiago
Arratsaldean ere makina bat jarduera antolatuko dituzte. Untzueta Dantza Taldeak dantza-plaza gidatuko du 17:00etatik 19:00etara arte. Izan ere, ordu horretan abiatuko da herriko kaleak girotuko dituen kalejira.
Musika eskaintza 21:30ean hasiko da, Erruki erromeriarekin. Horren ostean, Azkenakfy musika jartzaileek ordu txikiak arte luzatuko dute festa giroa.