Indusketa arkeologikoak burutuko dituzte Gardeako Santa Kruz baselizaren inguruan. Hiru arkeologia teknikarik eta boluntario gazte talde batek burutuko dituzte indusketak eta, aurreratu dutenez, uztailaren 4tik 12ra luzatuko dira lanak.
"Laudioko ondare historikoa balioesteko eta ikusarazteko helburuarekin" sustatu du Udalak ikerketa. Arkeologo-taldeak zundaketak, indusketa-lanak, erregistro grafikoa eta fotografikoa, planimetriak eta ager daitezkeen materialen inbentarioa egingo ditu, eraikinaren kanpoaldean zein barrualdean.
964. urteko aztarnen bila
Baselizak historiako hainbat unetan izandako okupazioa ezagutu nahi dute indusketen bidez. Izan ere, udalerriko eraikin erlijioso zaharrenetarikoa da. 964. urteko dokumentu batekin zerikusia izan dezaketen egiturazko elementu eta materialak aurkitzea espero dute arkeologoek. Dokumentu horretan, Gardean San Victor eta Santiagori eskainitako tenplu bat dagoela aipatzen da, baita baselizatik gertu dagoen Gardeagotxi izeneko herrixka baten existentzia ere.
“Lan horiekin, Laudioko historia ezagutu eta arakatu ahal izango dugu. Baseliza honen eta X. mendean izan zen tenpluaren iraganari buruzko aztarnak berreskuratzea espero dugu, eta Laudioko antzinako populazioa hobeto ulertzea”, adierazi du Juanjo Hidalgo arkeologoak.
Ander Añibarro alkateak ere balioan jarri du indusketen garrantzia: "Elementu horien balioa nabarmentzea ez da soilik toki- edo eskualde-mailan interesgarria, zabalagoa da, gure udalerriko bizimoduari buruzko ezagutza galtzea saihesten duelako. Horrek lekuaren garrantzia indartzen eta bertako biztanleek zein bisitariek merezi duen bezala kontuan hartzen lagunduko du, aldi berean ingurunearen bizi garapena eta garapen ekonomikoa sustatuz”.
