Herri galdeketa abiatu zuen Laudioko Udalak iragan maiatzean, Tabakorik Gabeko Munduko Egunaren testuinguruan. Galdeketaren xedea herrian "kerik gabeko espazioak ezartzea" zen bai eta tabakoaren kontsumoaren inguruko eztabaida sustatzea ere.
Udalak sei gune proposatu zituen tabakorik gabeko gune izendatzeko: Autobus-markesinak, herriko plaza, ikastetxeen inguruak, osasun-zentroen inguruak, Kultur Etxetik gertu dagoen eremua eta Aldai plazako merkatua.
Bozketaren emaitzak
Ekainaren 19an itxi zen bozketa fasea eta publiko egin dituzte emaitzak honezkero. Ikastetxeen inguruak, Zumalakarregi etorbideko markesina eta osasun zentroaren inguruak izan dira boto gehien lortu dituztenak; 78, 73 eta 76 hurrenez hurren. Udalak toki horiek seinalizatzeari ekingo dio orain. Autobus geltokiak eta osasun zentroko inguruak izango dira markatzen lehenak. Ikastetxeetan, aldiz, ikasturte berriarekin batera egingo dute lan hori.
Laudioko Udaleko Adikzioen Prebentzio Zerbitzuak garatu du proiektua, Minbiziaren Kontra Araban elkartearekin elkarlanean. “Kanpaina honen helburua, laudioarrak, tabakoak erretzaileen eta haien ingurukoen osasunean dituen ondorio kaltegarriez kontzientziatzea da. Espazio horietan jende asko ibiltzen da, baita adingabeak ere. Ekimen honek eztabaida sortzea, eta ohitura horren kaltegarritasunaz sentsibilizatzea eta kontzientziatzea espero dugu”, azaldu du Loli Muriel zinegotziak.