Lanuzteak egiten ari zarete Bilboko Metroko langileak, zergatik?
Hamarkada bat baino gehiago daramagu erosteko ahalmena galtzen, eta hori are larriagoa da zuzendaritzak soldatak %2 igotzeko egindako proposamenarekin. Jendea nekatuta eta erreta dago.
Lan-baldintzak hobetzea eskatzen dugu, batez ere, ordutegiekin eta txandekin lotutakoak. Azken orduko aldaketa etengabeen menpe gaude. Horrek kontziliazioa eragozten du eta orduak pilatzea dakar. Deskonexio digitala ere erregulatu behar da.
Hobekuntzak eskatzen ditugu prestakuntzaren arloan eta behin-behineko langileen eta beteranoenen baldintzetan.
Gidari lanak egiten ditugunon koefiziente murriztailea desagertu zaigu, eta horren alternatibaren bat bilatzea eskatzen dugu.
Geltokietako pertsonekiko arretan ere babes handiagoa eskatzen dugu. Zuzendaritzak arreta jasotzen duten estazioen denbora murriztu nahi du, baita geltoki batzuk egun osoa artatu gabe egotea ere.
Nola baloratzen dituzue orain arte egindako lanuzteak?
Oso positiboki. Jendea erantzuten ari da, kontuan hartuta gutxieneko zerbitzuak % 30ean dauzkagula markatuta.
Metro gidariek ere parte hartzen ari zarete, baina deialdi propioarekin, ezta?
Lanuzteen deialdia ELAk, CIMek eta UGTk egiten dugu langile guztientzat, eta SEMAF sindikatuak makinistentzat bakarrik.
Gidarien artean zeintzuk dira arrazoi nagusiak lanuzteetara jotzeko?
Esan dudan bezala, gure eskaerak langile guztientzat dira, ez bakarrik makinistentzat.
Enpresako zuzendaritzaren jarrera salatu duzue. Uste duzue posiblea izango dela akordioa lortzea?
Hilabete batzuk daramatzagu hitzarmen kolektiboa negoziatzen, eta zuzendaritzak bertan behera utzi ditu bilera batzuk. Hori dela eta, negoziazioak luzatzen ari dira. Ekainaren 20an, enpresak bere proposamena eman zigun eta, jakina, gure eskaeretatik urrun dago.
Ez dakit akordioa gertu egongo den, bileretan gertatzen dena ikusi beharko da.