Arkaitz Eskuza 17 urteko pilota jokalari gazteak Ataungo Txapelketa irabazi zuen igandean. Bikoteka jokatzen da proba eta antolakuntzak berak osatzen ditu. "Beñat Zubizarretak jokatu du nirekin, bere anaia profesioanala da", azaldu du laudioarrak.
Proba maiatzaren 17an hasi zen, baina laudioarrak jokatu du finalaurdenetik aurrera: "Faboritotzat jotzen gintuzten gu eta beste bikote bat eta horregatik ez ditugu partida guztiak lehiatu". Izan ere, iaz Eskuza finalaurrekoetara heldu zen Ataunen.
Euren parte hartzeari dagokionez, pozik azaldu da laudioarra: "Lehen eta bigarren partidak erraz irabazi genituen, eta ondo jokatu genuen. Egia da bigarren norgehiagokan espero genuela aurrelari on baten kontra aritzea, baina lesionatu zen. Gauzak horrela, 22-3 eta 22-5 irabazi genuen. Finalean 22-13 gailendu ginen, baina ez genuen oso pozik amaitu, gure jokoa ez zelako ona izan. Egia esanda, garaipena heldu zen aurkariek akats gehiago egin zituztelako. Gutxienez. txapela eskuratu genuen".
Ataungo txapela kontatuta, 29 garaipen lortu ditu guztira Eskuzak eta aurten irabazi du berarentzat bereziena dena: "Onena izan nintzen Euskadiko Gravni Txapelketan. Araba ordezkatu nuen eta Bizkaia, Gipuzkoa, Errioxa eta Nafarroako jokalarien kontra neurtu nituen indarrak eta trebezia".
Atzelari indartsua
Bere ezaugarriei buruz galdetuta, Eskuzak aipatu du atzelaria dela eta indar handiz jotzen duela pilota. Horrez gain, espazioak ondo estaltzen ditu eta ondo moldatzen da bolearekin, nahiz eta atzean jokatu.