Kultur tantak ipuina ikuskizun bilakatu du Sorginlarren taldeak. Arrigorriagan aurkeztu zuten proiektua, eta Kirikiñoko basoan ere taularatu zuten duela zenbait egun. Gaur, Ugarteko jaien baitan eskainiko dute emanaldia, 17:00etan. Laudioko Txosnagunean, aldiz, abuztuaren 17an eskainiko dute, 12:00etan.
Ander Fernandez Sorginlarreneko kideak adierazi duenez, finantzaketa bide gisa erabaki zuten argitaratzea: "Istorioa eta ilustrazioak prestatu genituen pare bat egunetan. Maketatu, liburu formatua eman, lagunei iritzia eskatu eta salmentan jarri baino egun bat lehenago serigrafiatu genituen azalak". Ez da izango, ordea, proiektu komertziala: "Liburuak banaka eginda daude, eskuz. Guk egiten dugu dena: enkuadernatzea, serigrafiatzea...". Hortaz, helburua ez da asko egitea, jendeak eskatu ahala kaleratzea baizik. "Normalean hogeinaka saltzen ditugu, eta hirugarren botaldia amaitzen ari gara". Dena den, moldaketa batzuk egitea aurreikusi dute datozen edizioei begira.
"Txontxongilo txiki batzuk ditugu ere, eta titere horiek erabiltzen ditugu emanaldian, Kultur tantak ipuinaren irudiekin eginak"
Kultur tantak ikuskizunean, euren argitalpeneko eta beste batzuetako ipuinak kontatzen dituzte. "Txontxongilo txiki batzuk ditugu ere, eta titere horiek erabiltzen ditugu emanaldian, Kultur tantak ipuinaren irudiekin eginak". Fernandezen hitzetan, tanten ibilbide bat da kontakizunaren oinarria: "Lezeagako kobazulotik pasatzen gara, sorginen kantuek lagunduta. Azken aldarrikapena, Lamuza Parkea berriro ere kulturaz betetzeko beharra da".
Liburua eskuratu nahi duenak sorginlarren@gmail.com helbide elektronikoan egin dezake eskaera. Laudioko beste 2 gunetan ere dituzte aleak: Zuhaitza liburudendan eta Faktorian. Ale bakoitzaren prezioa 12 eurokoa da "soldata prekariodunentzat", eta 15 eurokoa "ez-prekarioentzat".