Ostegunetan Laudion postua jartzen duten baserritarren elkarteak oharra zabaldu du salatzeko Udalak merkatua bertan behera uztea agindu diela abuztuan zehar.
Zehaztu dutenez, iragan ostegunean jaso zuten agindu hori. Orduan, egora ikusita, irailera arte itzuliko ez zirela esaten hasi ziren bezeroei, eta jeneroarekin zer egin pentsatzeari ekin zioten, aste hauetan ortuak “topera” daudelako.
Hala ere, tokiko erakundearen jakinarazpena jaso eta gutxira, agindu hori Udalaren “akats” bat izan zenaren zurrumurrua zabaltzen hasi zen, oharrean azaldu dutenez. Baina nabarmendu dute oraindik ez dutela horren jakinarazpen ofizialik jaso.
Gauzak hala, mina “jada eginda” dagoela salatu dute tokiko ekoizleek, bezero gehienei ostegunean bertan esan zietelako ez zirela irailera arte itzuliko. Horregatik uste dute, abuztuan azoka egiten utzita ere, jende gutxi bertaratuko litzatekeela.
“Nazkatuta” daudela nabarmendu dute ekoizleek: “Nazkatuta daude ez dutelako ulertzen baserri askoren mantenu bakarra asteko merkatua dela; astean egun bat edo bi bakarrik”. Era berean, “oso iraunkortasun laburreko elikagaiak” saltzen dituztela azaldu dute, “udal-kudeatzaileen plangintza edo koordinazio faltaren mende egon ezin daitezkeenak”.
Gauzak hala, akatsa “ahalik eta lasterren” aitortu eta “ahalik eta gehien” publizitatzea eskatu diote Udalari, “baldin eta merkatua abuztuan mantendu nahi badute”.
Horrez gain, “malgutasun eta konpresio” gutxi izatea leporatu diote tokiko erakundeari, merkatuaren oinarriak berritzeko prozesuari dagokionean.
Bukatzeko, baserritarrek nabarmendu dute tokiko erakundeak tokiko elikagaien ekoizpena eta ekoizleen zuzeneko salmenta sustatu beharko lituzkeela, Euskadiko tokiko feriak antolatzeko gidak hala zehazten duelako.
Aiaraldea Komunikabidea Laudioko Udalarekin jarri da harremanetan gaiari buruz galdetzeko, baina momentuz ez du erantzunik jaso.