Sugarrak klubeko presidente izateko interesdunek maiatzaren 31ra arteko epea daukate euren hautagaitza aurkezteko. Horretarako, erakundeko 10 bazkideren babesa beharko dute, eta klubarekin harremanetan jartzeko sugarraklaudio@gmail.com helbide elektronikora mezua bidaltzea izango da jarraitu beharreko bidea.
Hautagai bat baino gehiago egonez gero, ekainean egingo litzateke bozketa. Bazkide bakarrak bere burua aurkeztuko balu, hil horretan bertan lagatuko lizkiokete eskumenak eta ardurak.
Jokoren agurra
Hauteskunde prozesuaren beharra sortu du Óscar Muñoz 'Joko' presidentearen erabakiak. Izan ere, laudioarrak eskutitza zabaldu du Sugarraken sare sozialen bidez, azaltzeko bere ardurei uko egingo diela 2022/2023 denboraldia amaitzean.
10 urte bete ditu egungo presidenteak karguan
Jokok 10 urte beteko ditu aurten presidente gisa eta, aitortu duenez, pandemia hasi baino lehen ere pentsatua zuen urrats hori egitea. Hala ere, COVID-19ak eragindako muturreko egoeraren ondorioz, eutsi egin dio karguari klubeko biziraupena bermatu arte, berak esandakoaren arabera.
Saskibaloi komunitatea, eta emakumezkoak gehiengoa
Óscar Muñozek aitortu du 24 urterekin Sugarraken gidaritza hartu zuenean -Julen Vazquez, Juanjo Amenedo eta Julen Caleroren laguntzarekin- ez zegoela prest horretarako, baina erabaki zuzenak eta okerrak harturik, klubak aurrera egin duela, saskibaloi komunitatea sortu arte.
Gizonezkoen 3 talde izatetik, 16 talde izatera igaro da kluba, gehienak emakumezkoenak
Hain zuzen, Jokok gogoratu du 2012an 3 talde baino ez zeudela Sugarraken, eta guztiak gizonezkoenak. Egun, 16 dira taldeak eta emakumezkoen atalak kide gehiago ditu.
Eskerrak eta gatazkak
Óscar Muñozek esker hitz ugari izan ditu "agur" adierazpenean. Hasteko, bere bikotekidea izan du gogoan, arduraren zama arindu baitio urte luze hauetan. Bestetik, klubeko egitura osatzen duten entrenatzaile eta boluntarioentzat ere zabaldu du mezua, kirolaren balioak transmititzen baitituzte gazteen artean.
Horrez gain, Jokok gaineratu du presidentetzak ere gatazka eta ika-mika anitz ekarri dizkiola: "Nire izaeragatik eta izan ditudan ardurengatik. Beti jarri izan dut kluba beste edozerren gainetik". Zentzu horretan, saskibaloiari esker izugarri gozatu duela aitortu du, baina dena ez da gozoa izan: "Arazoak ere sortu dizkit maite dudan jendearekin, batzuk konpondu ditut, beste batzuk ez".
Gauzak horrela, bere bizitza pertsonalari lehentasuna emateko garaia heldu dela uste du Muñozek.