Larunbatean debuta egingo du Psilocybek Orbeko Etxean. Ordea, taldekideentzat ez da, inondik inora, euren lehen kontzertua. Izan ere, Julio, Txarli, Miguel, Fernando eta Jorge hamaika musika proiektutan aritu dira aurretik.
Bereziki ezagunak dira lehenengo laurak, Laudioko Skuatean aritu baitziren Arbol, Finisterrae edo Anti-Ke trash, metal eta hardcore bandetan. Gauzak horrela, Txarlik azaldu du Psilocybek 80ko metala egiten duela. Juliok, bateriaren atzetik, erantsi du rock kutsua ere duela bere soinuak.
Hain zuzen, eurek biek abiatu zuten proiektua duela urte eta erdi, eta gero Miguel (bigarren gitarra) eta Fernando (baxua) batu ziren. Taldera elkartu den azkena Jorge izan da. Berak Sarraskin parte hartu zuen, eta abeslaria da.
Psilocybek izugarri estutu du abuztutik bere jarduera. 7 abesti prestatu dituzte larunbaterako, eta Jorgek atzo egin zuen bere hirugarren entsegua.
Momentuz, taldeak ez du aurreikusi zuzeneko gehiago eskaintzea, larunbatekoa proba izango da. Dena ondo aterako balitz, Garrastatxun jotzea baloratuko dute, eta etorkizunean Bartzelona edo Madrilera joatea.
Larunbateko hitzordua Orbeko Etxean izango da 21:00etan eta Furrala crust talde madrildarrarekin eta Dead People punk bartzelonarrekin joko dute laudioarrek. 5 euro balioko du sarrerak.