Iraileko azken asteburua hartuko du Laudioko Euskararen Egunak

Aurten ere Ermualdera mendi ibilaldia egingo dute igandean. / Aiaraldea.eus

Irailaren 23tik 25era ospatuko dute Laudion Euskararen Eguna. Ohiko herri bazkaririk ez, baina beste hamaika jarduera egongo dira hizkuntzaren sustapenaren alde.

"Euskaraz bizi" lemapean euskararen jaia egingo dute Laudion irailaren 23tik 25era. Basalarrinak, Kirikiñok, Laudioko ikastetxeek eta Udalak prestatu dute beste urte batez Euskararen jaiko egitaraua, elkarlanean. 

Ostiralean hasiko dute ekintza sorta, 'Gune ibiltaria' erakusketarekin. Arratsalde osoan egongo da Topagunearen eta Laudioko Udalaren erakusketa herriko plazan, 17:00etatik 20:00etara, hain zuzen.  Euskaraldiari lotutako tailerrek emango diote segida barikuko programazioari, 18:00etatik aurrera talo eta txapa tailerra zein musika eskaintzak hartuko baitute Herriko plaza. Ordu erdi beranduago, Laudioko euskararen kale neurketaren emaitzak aurkeztuko ditu Udalak, Kultur Etxean. 20:30ean, aldiz, Ugarte Otxotearen kantujiraren doinupean ariko dira bizilagunak.

Larunbatean, "Laudion euskaraz" filma laburren rallya antolatuko du Kirikiñok Aldai plazan, eta 13:00etan egingo dute sari banaketa. Arratsaldean, ordea, dantza plaza egingo dute Herriko plazan, 'Erdizka lauetan' taldearen eskutik.

Igandean amaituko da ospakizun zikloa, Ermualdera Ugarteko plazatik abiatuko den mendi ibilaldiarekin. 9:30ean izango da irteera hitzordua, eta 12:00etan 'Laudio euskalduna' argazkia eta mokadua egingo dituzte aipatutako eremuan. .Antolatzaileek adierazi dutenez, eguraldi euritsua balego, Aldai plazara mugituko lituzkete jarduerak. 

Aurten ez da herri bazkaririk egongo. Urrezko makilaren ekitaldia, aldiz, abenduaren 3an egingo dute, Euskararen Nazioarteko Egunaren testuinguruan.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide