Laudioko ordenantza fiskalek jasotako hobariak handitzea proposatu du Laudioko EH Bildu udal taldeak, ordenantza fiskalen gainean zabaldu berri den eztabaidaren barruan. Ondasun Higiezinen gaineko Zergan (OHZ) eta hiri-hondakinen tasan izango luke eragina oposizioko udal-taldeak aurkeztutako proposamenak. EH Bilduren aburuz, bi zerga horietan ezarritako hobariak %95ekoak izatera heldu daitezke, "bizikidetza unitateen errenta eta kide kopurua kontuan hartuz beti ere".
Koalizio abertzalearen proposamenak egoera zaurgarrienean dauden herritarrak laguntzea du helburu. Modu berean, bi zergaren igoera proposatu du EH Bilduk, "udalaren ahalmen ekonomikoa eta zerbitzu publikoen kalitatea bermatzeko": jarduera ekonomikoren gaineko zerga eta katrasto-balio altuena dutenen ondasun higiezinaren zerga, hain zuzen ere.
“Ez da herritarrei zergak modu orokortu batean igotzeko momentua, baina politika publikoak mantentzeko erreforma fiskal baten beharra dago. Hau dela eta, gaitasun ekonomiko handia daukatenek ekarpen berezia egin beharko dute”, azaldu du Santi Hernando bozeramaileak.
Bestelako proposamenak
Herriko bigarren etxebizitzen alokairua bideratzeko proposamena ere aurkeztu du koalizio abertzaleak. Etxebizitza Hutsen Programaren barruan, bigarren etxebizitza alokairuan duten herritarrei ondasun higiezinen zergaren gaineko %50eko hobaria ezartzea proposatu du talde politikoak.
Horrez gain, tokiko ekoizleak babesteko neurriak ere aurkeztu dituzte ordenantza fiskalen eztabaidara; hala nola, ostegun eta larunbateko merkatuetan parte hartzen duten herriko ekoizleek tasa bakarra ordaintzea.
Azkenik, 'genero-inpaktuaren txostena' egitea eskatu du EH Bilduk, Berdintasun legeak hala eskatzen duela argudiatuta.