Igande gauean Landaluze kaleko auzokide batek han bizi den beste gizonezko nagusi bat harrapatu zuen, aparkatuta zeuden autoak marratzen zituen bitartean. Herritar horrek, kaleko bihurgunean bizi dena, ustezko gaizkilea heldu zuen eta Laudioko Udaltzaingoari deitu zion orduan.
Horrela azaldu dio Aiaraldea Komunikabideari kaltetutako ibilgailuetako baten jabeak. Antza, igande gauean jaso zuen udaltzainen deia eta gertatutakoa kontatu zioten. Ilaran aparkatuta zeuden zenbait autok kalteak zituzten eta gehienen jabeek jarri dute salaketa. Aipatzekoa da salaketa egin duten herritarretako bik, gutxienez, beste behin edo gehiagotan izan dituztela mota horretako kalteak: ezaugarri deigarriak dituzten marra lodiak, batzutan olatu formakoak.
Hainbat urtetako kalteak
Gauzak horrela, Aiaraldea Komunikabideari ibilgailu kaltetuetako jabeek jakinarazi diotenez, markek urtebete edo gehiago dituzte. Zehazki, batek azpimarratu du pandemia baino lehen bazituela marrak.
Marrek antza handia badute ere, Laudioko Udaltzaingoak ezin du ziurtatu egilea bera den, eta abiatutako ikerketa igandeko gertakariari dago lotuta soilik. Dena den, poliziak bazuen marra horien agerpenen berri, "baina ezinezkoa zitzaion asmatzea nork egiten zituen".
Hala eta guztiz ere, momentuz, poliziak ez du frogatutzat ikertutako gizonezkoa denik egilea.