Sultana Jaya erresistentzia saharar baketsuaren ikurra Aiaraldea Ekintzen Faktorian egongo da igande eguerdian, 12:00etatik 14:00ak arte, hain zuzen. Giza Eskubideen eta Bitarteko Naturalen Harrapaketaren Kontrako Ligako presidentea da Jaya.
Duela bi urte inguru agintari marokoarrek debekatu zioten bere etxetik ateratzea, arrazoiak argitu gabe. Gauzak horrela, ekintzaileak elektrizitate eta urik gabeko 558 eguneko setioa igaro zuen bere etxean, Boujdorren, hau da, Marokok okupatzen duen Mendebaldeko Saharan.
558 egunez agintari marokoarrek bere etxetik ateratzea debekatu zioten Sultana Jayari. Bolada horretan eraso ugari jasan izan zituen indar marokoarren eta paramilitarren aldetik.
Bolada luze horretan Jayak eta bere senideek mota ugariko erasoak pairatu zituzten segurtasun indar marokoarren eta talde paramilitarren aldetik, Saharako autodeterminazioa aldarrikatzeagatik. Berez, mehatxuak eta mota oroko erasoak -sexu erasoak barne- jasan zituen Sultana Jayak.
Setio egoera ekainean amaitu zen, sahararra Kanariar uharteetara heldu baitzen. Irailean Jaya ekintza politikora itzuli da eta, esaterako, duela 10 egun Parlamentu frantziarrean hitz egin zuen Marokoren giza eskubideen urraketa salatzeko.
Igandean Faktorian
Aiaraldeko Saharako Errepublika Arabiar Demokratikoaren lagunen elkartearen eta Saharako diasporaren eskutik, Sultana Jayak ongi etorria izango du Aiaraldea Ekintzen Faktorian, 12:00etan. Ondoren, ekintzaileak hitza hartuko du. Ekitaldia arabiarrez izango da. Izena emateko aukera dago hemen.