Igor Arzuagaren "Hau ez da pipa bat" ilustrazioak janzten du ostiralaz geroztik Laudioko Zumalakarregi etorbidea. 15 metro koadroko horma irudiak artista aretarraren ilustrazioa jaso du, ekainean Kulturlab egitasmoaren barruan abiatutako esku-hartze artistikoari segida emanez.
Arzuagak, René Magritte artista belgikarrari egin dio keinu horma irudi bilakatu den ilustrazioan. Argazki-oinarri baten gainean tratamendu digitalaren bidez egindako ilustrazioa da artista aretarrak aurkeztutakoa.
Inside Out proiektua
Kulturlab 02 ekimenak bere hurrengo egitasmoa ere aurkeztu du; Fair Saturday kultur mugimenduarekin bat egin, eta nazioarteko Inside Out proiektuaren barruan jasotako 300 argazkiak jarriko dituzte Laudioko "toki enblematiko" batean.
Azaroaren 26an jarriko dituzte argazki guzti horiek, oraindik iragarri ez duten lekuan. Baina laudioarrei adi egoteko eta erretratuen instalazioan laguntzeko deia zabaldu dute: "kulturaren papera aldarrikatzeko, eta Lamuza parkea erreferentziazko kulturaren parek gisa berreskuratzeko ahaleginak bikoizteko".