Herri Txikien Akademiak bateratze saioa egingo du bihar Laudion, Faktorian, hain zuzen. Egitasmoa Eusko Ikaskuntzako proiektu pilotua da eta aurretik egindako hiru hausnarketa saioen (Kuartangon, Zalduondon eta Urturin) emaitzak elkartu nahi ditu.
Izan ere, ekimenaren helburua da Arabako landa eremua biziberritzea eta horretarako landa eremuko ekintzaileak, lanean diharduten erakundeak (ezagutza kualifikatua dutenak) eta erabaki ahalmena duten administrazio eta botere publikoetako ordezkariak erakarri nahi ditu Eusko Ikaskuntzak, elkarlanean aritzeko.
Landa eremuko despopulazioa
Herri Txikien Akademiaren helburu nagusiena da landa eremuko lurraldean despopulazio joera gelditzea eta hiru ardatz jorratzen ari dira horri aurre egiteko.
Alde batetik, biztanle berriak erakartzeko dauden gabeziak identifikatzea: etxebizitza hutsen erabilpena edota obrak egiteko arauak malgutzea.
Beste alde batetik, erakundeak uste du behar duela "landa eremuak bere garapen ekonomikoa izatea eta gaur egungo trantsizioekin bat egitea (ekologikoa, digitala, demografikoa). Despopulazioari aurre egiteko ezinbesteko baldintza da landa eremuan enpleguak sortzea, eta bereziki garrantzitsua emakumeek lan duinak izatea, izan ere, landa eremuan maskulinizazio tasa altuak dira".
Azkenik, landa eremua dauden belaunaldi ezberdinen arteko harremanak sustatu nahi dituzte, herriak ez daitezen lo lekuak izan. Esparru horretan zenbait jarduera proposatzen dituzte: auzolana, zaintza sareak, ekimen kulturalak eta ondare inmateriala zaintzeko praktika onak.
Egitaraua
Xede garrantzitsuak finkatu arren, biharko jardunaldia ez da luzea izango. Hain zuzen, 17:00etan hasiko da bilera, 17:15ean aurreko hiru saioetako ondorio nagusiak jorratuko dituzte, 17:45ean Herri Txikien Akademiaren aurkezpena izango da eta 18:30ean amaitzea aurreikusi dute.