Salahdin Abdala Abdala Hanafi -Salah Lebsir ezizenez ezaguna- Laudion egon zen atzo udalaren aitorpena jasotzeko, Loli Muriel zinegotziaren eskutik. Tokiko erakundeak bere ibilbide ekintzailea nabarmendu zuen, herri sahararraren alde.
Ekitaldia Herri Babesarearen IV. Foro Ibiltariaren barruan egin zuten, Andoain, Amorebieta-Etxano, Durango, Ea, Bilar, Errenteria, Galdakao, Hernani eta Irungo Udalen parte hartzearekin. Egitasmo horren helburua da giza eskubideei buruzko kontzientzia sustatzea, horien alde borrokatzen dutenak goraipatuta.
Salah Lebsir Nushatta Foundation erakundeko kidea da. Talde horrek lurralde saharar okupatuetan zein errefuxiatu kanpalekuetan gertatzen denari buruzko informazioa zabaltzen du, dokumentalak eginda, besteak beste.
Gose greba luzeak egin zituen Lebsirrek bere espetxealdian, funtsezko eskubideak izateko. Adibidez, bere senideak ikustea.
Une hauetan Lebsir estatu espainiarrean dago Mundubat Gobernuz Kanpoko Erakundearen giza eskubideen defendatzaileen programari esker. Horretarako Aljeriako pasaportea baliatu behar izan du. "Bestela, arriskua nuen Marokoko espetxeetan berriro bukatzeko. Espainiak marokoarren eskuetan uzten ditu ekintzaile saharrak, eta nire kontra bilatzeko eta atxilotzeko agindua dago" gogoratu zuen sahararrak.
4 urtez espetxean
Ekintzaileak lau urteko espetxealdia bizi izan zuen 2015etik 2019ra. "Lau urteak gogorrak izan dira, nire lana kazetari gisa egiteagatik. Nire epaiketa ez zen justua izan eta espetxez aldatu ninduten prozesuan, euren interesen arabera", salatu zuen.
"Nire sufrimendua ez da izan nirea bakarrik, nire familiarena ere izan da. Ez dut nire egoerari buruz hitz egin nahi, hemen borroka sahararra aldarrikatzeko bainago, baina nire senideak leku batetik bestera ibili dira hilean behin hiru minutuz ni ikusteko", azpimarratu zuen ekintzaileak.
Bere kartzelaldian hainbat gose greba egin zituen, 32 egunekoak edota 45 egunekoak: "Soilik nire senideen ahotsa entzun ahal izateko. Edonola ere, nik pairatutakoa hainbat preso politikok jasaten dute orain".
Hedabideen gerra
Lebsiren aburuz, egungo Saharako gerra informazioarena da, horregatik Nushatta Foundationek hainbat dokumental ekoiztu ditu errefuxiatu kanpalekuei buruz, edota lurralde okupatuen bitarteko naturalen harrapaketa arbuiatzeko.
Saharrara oso eskertuta agertu da euskal gizarteak erakutsitako elkartasunagatik bere herriarekin, "Nobel Saria merezi du euskal gizarteak horregatik".
Halaber, Lebsi oso kritikoa izan da Pedro Sanchezen jarrera aldaketarekin Saharako gatazkan: "Independentzia eta autodeterminazioa merezi du herri sahararrak. Espainiak 1975ean abandonatu zuen, eta Sanchezek gauza bera egin du".
Dena den, atzo Laudion jasotako harrera eskertu zuen omenduak; eta adierazi zuen espero duela presoentzako eta kazetarientzako babes hori luzatzea.