Azaroaren 26an arte ekintza ikusgarria egingo du KulturLabek Lamuza plazan. Horretarako, 300 laudioarren erretratuekin irudi erraldoia osatuko du. Hitzordu horrekin, nazioarteko bi arte egitasmotara batuko da.
Alde batetik, 'Inside Out' proiektuari egingo diote ekarpena. Elkarteak berak azaldu du hori: "Parisko "JR" hiriko artistaren proiektua da, 148 herrialdetan garatu dena, 2300 ekintza artistiko baino gehiagoren bidez". Jadanik 450.000 erretratu baino gehiago bildu dituzte ekimen horretan eta laster laudioarrenak ere egongo dira horien artean.
Bestalde, 'Fair Saturday' -Azokako larunbata- proposamenarekin ere egingo du bat performanceak. "Jaialdi hau Black Friday famatu eta ezagunenaren biharamunean ospatzen da, neurrigabeko kontsumismoa eta erosketa konpultsiboaren aurrean kultura eta garapen soziala bultzatzeko beharra salatzeko. Bilbotik sortuta, Fair Saturday proiektua gero eta urrunago hedatzen ari da, eta Laudiotik bat egin nahi dugu ekimen errebindikatzaile, kultural eta sozial honekin" azaldu du KulturLabek.
Elkarteak ekintzaren berri eman du herritarrak animatu daitezen laguntzen eta erretratuak itsasten. Horrez gain, erretratu berriak egin daitezke. Oraindik ere argazkietan ateratzea nahi badu norbaitek, hauxe da argazkilariarekin harremanetan jartzeko telefono zenbakia: 656 70 70 80. KulturLabek azaldu du interesgarria dela interesdunek taldeka antolatzea, argazkilariari lana errazteko.
Hitzordu aldarrikatzailea
Egitasmoaren helburua da ez soilik ondo pasatzea edo artea sortzea. KulturLaben helburua da mezua bidaltzea erakundeei: "Erakundeek ausartagoak eta anbiziotsuagoak izan behar dute, eta Lamuza Parkeak eskaintzen digun aukera eta garatzen ari diren obrak baliatu behar dituzte haratago joateko eta erreferentziazko gune kultural erakargarri bat sortzeko. Leku moderno eta parte-hartzailea, egungo kultura sustatzeko balioko duena, baina baita palanka ere egingo duena, gazteen artean kultura sustatzeko eta gorabidean dauden kulturei lekua emateko.