Foru Gobernu Kontseiluak gaur abiatu du esleipena Lamuzako Kultura Etxeko obrak amaitzeko. Guztira, 2.955.797 euroan egin du eta 18 hilabeteko epearekin. Aurreikuspenen arabera, prozedura bukatuko da udaberrian, obrak 2023ko uda baino lehen hasi eta 2024aren amaieran burutzeko.
Zaharberritze proiektuaren helburua da ia 4.000 metro koadroko eraikin horren funtzionaltasuna eta irisgarritasuna hobetzea. Besteak beste banaketa aldatuko dute, eta jauregiaren hegalak lotuko dituzten ibilbide berriekin.
Irisgarritasuna
Lanen xedeetako bat da eraikin guztiz irisgarri bihurtzea igogailu berri baten bidez, desnibelak kenduta, zoladura batzuen kota aldatuta, arrapala txikiak erabilita eta mugikortasun urriko pertsonentzako komun irisgarri berriak eraikita. Proiektuak, gainera, ardatz-korridore handi bat aurreikusi du, jauregiaren mutur bat bestearekin lotzeko.
Halaber, baliozko elementuak eta apaingarriak zaharberrituko dituzte: zurezko eskailerak eta burdina forjatuzko barandak, estaldura zeramikoak, tximiniak, ate batzuk... Horrez gain, gelen zoladuretan, hormetan eta sabaietan, instalazio elektrikoetan, iturgintzan, segurtasunean eta berokugailuetan ere esku hartuko dute.
5 urtez itxita egongo da
2020an hasi ziren lanak Lamuzako Kultura Etxean eta horren ondorioz, 2019ko urrian eskatu zieten hainbat talde erabiltzaileri lekua uzteko. Hortaz, 5 urtez egongo da itxita eraikina.
Lehen fase horretan estalkiak eta fatxadak berritu zituzten, 2,8 milioi euroko aurrekontuarekin. Aurretik, Musika Etxearen eta Kasinoaren birgaitze integralari ekin zioten, 3 milioi eurorekin. Egun, udal liburutegia Musika Etxean kokatuta dago, esaterako.