Udan indusketak gauzatu eta gero, Juanjo Hidalgo historialariak hitzaldia egin zuen larunbatean Santa Krutz baselizan bertan. Tenpluaren barruan egin zuen azalpena, eta han dauden ondare elementu txikiak goraipatu zituen; mensulak edota polikromatuak, esaterako. "Bistakoak izan arren, ia ez dira ikusten, eta 500 urte inguru dituzte", ziurtatu du Hidalgok.
Halaber, historialariak argitu zuen indusketak probatu duela baseliza baino lehen ez zela egon bestelako tenplurik kokapen horretan, zeina 1500. urtekoa den, gutxi gorabehera. "Hori argi geratu da ez bakarrik dokumentazioaren bitartez, aztarnak ere daude hori islatzen dutenak", aipatu du.
Hori erakutsi du, adibidez, indusketan agertutako txanponak. Berez, 1470. urtekoa da, Enrike IV. erregearen garaikoa, baina diru hori indarrean egon zen XVI. mendearen hasieran ere.
Hidalgok bereziki baloratu du herritarren erantzuna: "40 lagun inguru batu ginen eta asko Gardeakoak ziren. Izan ere, baselizak xarma handia dauka auzokideentzat eta askok uko egin zioten eraikitako parrokia berrira -XX. mendearen erdialdean egindakoa- joatea mezara. Haserre zegoen jendea, baselizako zenbait elementu eliza berrira eraman zituztelako".
Argazkiak: Antonio Muñoz