Kantu Kolore musika proiektuak Laudio bisitatuko du bihar. Zehazki, 12:30ean Krokodilo ikuskizuna eramango dute Alberto Acero plazako oholtzara. 2016an sortutako taldea irakaskuntzari lotutako zazpi lagunek osatzen dute. Hain zuzen, irakasle hauek konturatu ziren umeek barneratzen dituztela abestien hainbat mezu. Gauzak hala, eduki didaktikoak eta dibertimendua uztartzen dituzte kantetan.
Eduki horiek hainbat balio sustatzen dituzte: sexu aniztasuna (Ni naiz), ekologia (Plastik, Esna zaitez) edota euskararen erabilera (Euskara). Horrez gain, eskoletan zein etxeetan lantzeko koreografiak eta karaokeak ikusgai dituzte webgunean.
Ikuskizuna Vital Egunaren bitartez helduko da Aiaraldera, eta gero Murgiara eramango dute 18:30ean. Ekimen horren barruan, Fundazioak hainbat emanaldi egingo ditu Araban, besteak beste, Natos eta Waor egongo dira bihar Gasteizko Foru plazan.
Ekitaldia ahalik eta jasangarriena izateko, hurrengo aholkuak zabaldu ditu Fundazioak:
- Erabil itzazu garraiobide jasangarriak ekitaldira hurbiltzeko. Oinez ere etor zaitezke edo bizikletaz.
- Saihestu itzazu erabilera bakarreko ontziak.
- Erabil itzazu guk jarritako edukiontziak hondakinak birziklatzeko.