Laudioko Udalbatzak hartu zuen atzo Laudioko Nazioarteko Ziklokrosaren XXXIV. edizioaren aurkezpena. Alde batetik, antolatzaileek eta laguntzaileek hartu zuten hitza, baina ikusleen artean eskualdeko puntako txirrindulariak ere egon ziren, Hodei Muñoz eta Lukene Trujillano, kasu.
Laudioar Txirrindulari Elkarteak goraipatu zuen 80 boluntariori esker egin dezaketela lasterketa, eta 650 txirrindulariren parte hartzea espero dutela, 700 baita muga. Europa osoko puntako kirolariren bisita izango dute, Karrantzako lasterketa asteburu berean lehiatzen baita eta txapelketa kontinentalerako puntuak lortzeko aukera bikaina da jende ugarirentzat.
Ander Añibarro alkateak eta Ana del Val Arabako Foru Aldundiko Kirol Diputatuak goraipatu zuten probak lortzen duela Laudio Europako mapan jartzea.
Ibilbideari dagokionez, iazko bera izango da, baina ezberdintasun nabaria topatuko dute parte-hartzaileek: 2021ean lokatza zen nagusi eta aurten ez du euririk egin, hortaz, ibilbide azkarra izango da.
Iñaki Pinedo Arabako Txirrindularitzako Federazioko ordezkariak aipatu zuen luxua dela C1 kategoriako lasterketa izatea lurralde historikoan, "Federazio txikia izanik". Erme Egiak, bere aldetik, gogoratu zuen horrelako proba bat antolatzeak suposatzen duela 35.000 eta 40.000 euro arteko inbertsioa eta egingarria dela laguntzaileen ekarpenei esker.
Publikoan egon arren, Hodei Muñoz aiararrak ez du tokia hartuko irteeran, Europako Txapelketan arituko baita. Aurkezleak Munduko Txapelketan izandako esperientziari buruz galdetu zion eta gazteak aitortu zuen bizipen polita izan zela, "baina gogorra".