Urriaren 6an estreinatu zen Los rengolnes torcidos de Dios filma eta asteburu honetan ikusgai egongo da Orozkon, 19:00etatik aurrera. Kritika oso onak jaso dituen ikus-entzunezko ekoizpen hori Torcuato Luca de Tena idazlearen izen bereko eleberrian oinarrituta dago eta antzezle aski ezagunak ditu; Barbara Lennie edota Eduard Fernandez, esaterako.
Aiaraldearrentzat, ordea, badago beste aurpegi ezaguna aktoreen artean, Iñigo Martinez laudioarrarena, hain zuzen. Artistak deia jaso zuen duela bi urte. Agente bat gorputz ez normatiboak zituzten antzezleen bila ari zen, zoroetxe batean girotutako film baterako. Hori dela eta, Martinezekin jarri zen harremanetan: "Nire argazki batzuk bidali nizkion eta castinga gainditu ondoren, kontratatu ninduten. Hiru asteko lana izan zen", azaldu du.
Bitarteko handiko ekoizpena
Atresmedia da proiektuaren bultzatzaileetako bat eta Martinezek berehala sumatu zuen apustu ekonomiko garrantzitsua zegoela pelikularen atzean: "Armugan grabatu nuenean, talde txikia ginen. Honetan, ordea, dozenaka langile zeuden, agian ehun baino gehiago; jantziak, kamarak, antzezleak... Zoroetxea simulatzeko enpresa baten eraikina moldatu zuten eta logelak, egongelak eta abar prestatu zituzten. Oso ondo egina zegoen".
Ezustea protagonismoan
Martinezek argi zuen filma hasi zenean bere rola oso zeharkakoa zela. Dena den, ezuste polita izan zuen: "Finean, estra bat nintzen. Zoroetxeko eszenetan baino ez naiz agertzen eta ez dut lerro bat bera ere. Hala eta guztiz ere, sorpresa izan zen ikustea trailerrean agertzen naizela. Jende ugarik deitu edo idatzi ninduen esateko ikusi ninduela".
Esperientzia baloratzeko orduan, laudioarrak oso iritzi positiboa adierazten du: "Egia da lanaldiak oso luzeak zirela, 10 edo 12 ordukoak, baina jende guztia oso jatorra eta atsegina zen eta bizipen polita izan zen".