Laudioko Gazte Asanbladak eta Jaiak Koordinakundeak berriki zabaldu dute Gazte Egunaren kartela. Azaroaren 26an ospatuko dute eta larunbat hori ekintzaz josiko dute goizetik gauera arte.
Hasteko, txupinazoa jaurtiko dute 12:00etan eta une horretan hasiko dira umeentzako jarduerak Kirikino taldearen eskutik eta bertso poteoa Aroa Arrizubietarekin eta Bittor Altuberekin.
14:30ean herri bazkariaren ordua helduko da Laudio Institutuan eta jarraian bingo musikatua eskaini eta olinpiadak jokatuko dituzte. 19:00ak arte egongo dira ikastetxean eta ordu horretan abiatuko da karropoteoa herrigunetik, ondoren afaltzeko.
Bukatzeko, 21:00etan Iratzar erromeriak joko du eta DJ Azkenak Itxi Dezala taldeko kideek (hau da, Azkenak jai kuadrillako musika jartzaileek) itxiko dute eguna.
Tiketak salgai daude Sorgin eta Leize tabernetan. 8 euroko tiketak zapi eta bazkariaren truke izango dira eta 11 eurokoek zapia, bazkaria eta afarirako eskubidea emango dute.
2022ko edizioarekin, 2014tik ospatzen ez zen jaiari jarraipena emango diote. Hemen ikusi daiteke orduko hartan plazaratutako abestiaren bideoklipa: