Azaroaren 26an Laudioko Kulturzaleak Taldeak ekintza oso berezia gauzatuko du 12:00etatik 15:00ak bitartean: Inside Out egitasmora batuko da eta 313 herritarren erretratuak itsatsiko dituzte Lamuza plazatik Kultura Etxearen sarreraraino. 140 metroko bidea osatuko dute eta jarduera osoa grabatuko dute, gero sareratzeko.
Kolektiboak xehetasun gehiago eskaini ditu: "Bidearen zabaleraren 3 ilaratan jarriko ditugu erretratuak, dron batekin eta hainbat kamerarekin grabatuko den jarduera batean. Ondoren, gertatutakoa bideo batean islatuko da, eta nazioarteko ekimenaren web-orrian txertatuko da. 140 metro linealeko "alfonbra" fotografikoa. Behar bezala lehortu ondoren, laudioar guztiek zapaldu eta bizi ahal izango dutena, hondatzen doan arte, eta, azkenik, kendu egingo dena hondatzeak hala gomendatzen duenean".
Paris-New York konexioa
Ekintzak nazioarteko adar anitzak ditu. Alde batetik, JR artistak sortu zuen Parisen, baina egun antolakuntza New Yorken dago eta bere irizpideak jarraiki egikarituko dute asmoa: "ekitaldiaren munduko antolakuntzak New Yorketik adierazten duen bezala, 90x135cmko neurriak izan behar dituzte argazkiek".
Helburua
Edonola ere, ekimena ez da arte hutsa, xede argiak ere baditu. Hain zuzen, erretratuetan agertzen diren laudioar guztiek testu bat sinatu dute, eskatzeko erakunde publikoei politika berritzaileak, ausartak eta konprometituak, Lamuza Parkea Kultura Parkea bilakatzeko.
Azken txanpan laguntzeko deia
Iaz hasi zen Luisan Garcia argazkilaria erretratuak hartzen Inside Out performancerako eta jadanik proiektuaren azken fasera hurbiltzen ari da Kulturzaleak. Hori dela medio, nahi duenak laguntza eskaintzeko aukera izango du.
Horretarako bide anitzak egongo dira. Alde batetik, kulturzaleak@gmail.com mezu elektroniko bidali daiteke.
Horrez gain, azaroaren 23an, 18:30etik aurrera, lan-bilera bat egingo dute Herriko Plazako Aretoan, zereginak banatzeko eta ekitaldia antolatzeko.
Jarduera, gainera, duela urte batzuk Bilbon jaio zen eta Araban egoitzetako bat duen Fair Saturday nazioarteko jaialdiaren parte izango da. Laudiotik ere bat egingo dute kulturak gizartean duen paperaren aldarrikapen horrekin, Black Frydayak irudikatzen duen kontsumismo neurrigabearen aurrean.