Gazteleku berriaren diseinua izan dute hizpide Laudioko Haur eta Nerabeen Udal Kontseiluan

Laudioko ikastetxeetako 20 gaztek hartu dute parte dinamikan, alkatearekin eta udal gobernuko zein opozisioko bost zinegotzirekin batera. 

Laudioko Haur eta Nerabeen Udal Kontseilua egin dute gaur goizean Laudioko Udaletxean. Herriko ikastetxeetako 20 haurrek hartu dute parte dinamikan. Ander Añibarro alkateak egin die ongi-etorria, udal gobernuko zein opozisioko beste bost zinegotzirekin batera. 

Jarraian abiatu dute ordu eta erdiz luzatu den ariketa. Ikasleak taldetan jarri dira, eta hiru gai eztabaidatu eta landu dituzte: gazteleku berria, berdintasunerako film labur bat egitea eta adingabeen mendekotasunei buruzko ikus-entzunezko lan bat egitea.

Hiru proiektu horietako bat aukeratu behar izan dute gazteek, lantzeko. Azkenean, Gaztelekuaren ideiaren alde lerratu dira, "eguraldi txarretik babestuta dagoen espazio egokia delako gazteentzat". Adierazi dutenez, adikzioen prebentzioa ere landuko dute, zeharka. 

Bien bitartean, udal ordezkariek ere beste dinamika bat garatu dute. 'Dixit' izeneko karta jokoa baliatu dute, haur eta nerabeei begirako politiken inguruan eztabaidatzeko. 

Laudioko Udalak azaldu du haur eta helduen arteko "irakaskuntza kolektiborako" gunea dela kontseilua. "Bertan, Laudioko bizitzan eta herritarrengan eragina duten gaiei buruz iritzia eman, baloratu eta ideiak proposatzen dira. Azken helburua erabakiak tokiko eremuan hartzea da, haur eta nerabeentzako udal-politikekin zerikusia duten gaietan, batez ere".

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide