Eklipse argitsua deitu diote erakusketaren antolatzaileek Jose Arrueri (Bilbo 1885 – Laudio 1977). Gerra zibilak bete-betean markatu zuen bere bizitza pertsonal zein artistikoa. Politikoki eta sozialki konprometitutako gizona zen, ANVko militantea, eta aldarrikapenez bustitako kartelak, afixak eta komiki tirak publikatzen zituen zenbait egunkari eta aldizkaritan. Gerra zibilean Italiako tropek atxilotu eta bi urte eman zituen preso. Horren ostean, zerotik hastea erabaki zuen, eta orduan etorri zen Aretara, 1940an, eta Laudiora 1963an.
“Eklipsea, nahitazko argigetze hura, itzalaldia alegia, bere margo-lanetan ageri diren oskarbietako argi liluragarrietan itzaltzen da, poetikoak, artistikoak baitira. Argiak dio berriz ere laguntzen, bere margoak maite ditugunoi lagun egiten digu, bai eta, halaber, bera ezagutu eta berarekin gozatu ahal ukan zuten guztiei”, deskribatu du Javier Gutierrez Campañonek.
Erakusketa, bi zatitan
Jose Arrueren obra zabala jasotzeko, erakusketa bi zatitan banatu dute. Lehenengo partean artistaren jatorrizko obra ikusteko aukera egongo da: koadroak, margolanak, gouacheak, akuarelak… Goiko aldean, aldiz, erakusketa didaktiko bat prestatu dute, Jose Arrueren ibilbidearen inguruko informazioa jasotzen duten panelekin. Antolatzaileek azaldu dute Arrueren bizitzarekin hasten dela goiko erakusketa, bere familia, lagunak, ikasketak… azaltzearekin batera.
Jarraian, artistaren ibilbidea irudikatzen duten margolanak, zeramikak, afixak, prentsarako egindako marrazkiak, egutegiak, postalak, horma-irudiak, beira-irudiak... bildu dituzte.
Atzo bertan inauguratu zuten Jose Arrue erakusketa eta abenduaren 17ra bitartean bisitatu ahalko da, Lamuza parkeko Kultura Etxean. Gainera, eskoletako ikasleek bisita gidatuak egingo dituzte artista gertuagotik ezagutzeko.
Atzeko lana
Erakusketa hau hainbat pertsonaren urteetako lanaren emaitza da. Alde batetik, Jose Arrueren biloba den Nati Arruek urteak daramatza josearrue.org webgunea zuzentzen, artistaren beste zenbait jarraitzailerekin batera. Bertan, Arrueren inguruko informazioa eta mota guztietako lanak biltzen dituzte.
Hori horrela, Laudioko Udalak Sant-Roque Anaidiari galdegin zionean Arrueri buruzko erakusketa bat egin nahi zuen, segituan osatu zuten batzordea. Horren parte izan dira, besteren artean, Jose Maria Castillo argazkigintza teknikaria eta Javier Reguera Ardanza eta Javier Garcia Uzal dokumentalistak, horiek ere aipatutako webgunea urte luzez elikatu dutenak.
Erakusketa prestatzeko instituzioen, museoen eta jabeen laguntza izan dutela adierazi dute, eta eskerrak eman nahi izan dizkiete koadroak laga dizkietenei, laguntza ekonomikoa eman dietenei, erredakzio eta itzulpen lanetan aritu direnei eta lana erraztu dieten guztiei.
Argazkiak: Migel Brizuela