Larunbatean Tokiko Sari Nagusiaren LVII. edizioko final handiak jokatuko dira Laudioko San Roke Udal Bolatokian. 57 urtez antolatu du txapelketa klub laudioarrak, eta urrian hasi zuten aurtengo edizioa.
48 parte hartzailerekin hasi zuten lehiaketa, bikotekako zein bakarkako kategorietan. Urriko lehenengo hiru asteetako jaurtiketa guztien batura egin eta hurrengo fasera igaro ziren jokalariak.
Bakarkako lehen 16 kirolariek euren artean torneoa jokatu dute, eta kanporaketa sistema berdina erabili dute lehenengo zortzi bikoteek. "Hau da eskualdeko txapelketa bakarra kopa formatuko kanporaketa duena, gainerakoek puntuazioen araberako sailkapena egiten dute", azaldu dio Oscar Larrazabal klubeko kideak Aiaraldea Komunikabideari.
Final handiak larunbatean
Abenduaren 10ean amaituko da txapelketa, binakako zein banakako final handiekin. Binakako kategoriarekin hasiko dira larunbatean: 16:30ean Bea Isasi eta Alberto Lopez bikotea Oscar eta Carlos Olabarrieta anaien aurka neurtuko da. Banakako finala 18:30ean jokatuko dute, eta Carlos Llano eta Carlos Olabarrieta egongo dira aurrez aurre.