Miren Agur Meabek eta Dana Moyak urrezko amaiera emango diote Emakume Sortzaileen Zikloari, olerkia eta musika nahastuko duen Begiak zerumugan ikuskizunarekin. Emanaldiak barne bidaia proposatuko dio publikoari eta horretarako Meaberen poemak eta Moyaren musika izango du -pianoan-. Aiaraldea Komunikabideak aukera emango du sarrera bikoitza eskuratzeko. Ekitaldia abenduaren 16an izango da, 20:00etan Faktorian eta sarrerak salgai daude Faktoria.eus webgunean.
Hain zuzen, 2020an argitaratutako izen bereko olerki bilduma baliatzen du Meabek oinarri gisa lan honetan. Osagarri moduan Dana Moya kubatarra du. Musikariak euskal olerkariekin elkarlanak izan ditu aurretik, Joseba Sarrionandiarekin, besteak beste.
Gogoratu beharra dago Miren Agur Meabek 2021ean irabazi zuela Espainiako Poesia Saria Nola gorde errautsak kolkoan lanari esker eta mugarria jarri zuen horrela, lehen aldia baita euskarazko testu batek aitortza hori jasotzen duela.
Edonola ere, idazle lekeitiarrak ibilbide luzea egin du hori lortu baino lehen. 1986an argitaratu zuen estreineko aldiz eta 2000. urtetik aurrera ekoizpen handiaren arduraduna izan da bai haur eta gazte literaturan, zein narrazioan edo olerkian.