40 plazako disuasio-aparkalekua eraiki du Laudioko Udalak industrialdearen sarreran. Hasiera batean Goikoetxe inguruan egitekoa zen, adinekoen egoitzaren ondoko lursailean, Arabako Foru Aldundiak eremua laga baitzion urrian. Auzoko Batzarretan herritarren iritzia jaso ostean, 120 metro urrunago egitea erabaki zuten, industrialdearen sarreran. Udalak ohar bidez adierazitakoaren arabera, “konponbide horrek obra gutxiago egitea ekarriko du”.
Ander Larrinaga Hiri Garapeneko zinegotziaren arabera, aparkalekua “oso aukera interesgarria da erdigunetik ibilgailuen zirkulazioa murrizteko”. Izan ere, bertatik 450 metrora dago, eta Goikoplazako eraikin berrietatik 150 metrora.
Erakundearen arabera, aparkalekuak bi helburu beteko ditu: alde batetik, “inguruan izaten ari den hirigintza-hazkundeari” eman nahi dio erantzuna eta, bestetik, “Odeibarreko aparkalekua kendu izana” konpentsatu nahi du.
Udalak argitu du “hurrengo asteetan” gaituko duela aparkalekua eta horren erabileraren jarraipena egingo duela, “eraginkortasuna baloratzeko eta etorkizunean egin daitezkeen jarduketa berriak baloratzeko”.