Galder Hernandez Bergantiñosek ezusteko lorpena eskuratu zuen abenduaren 10ean Almerian. Hain zuzen, Vera Playan izan zen 10 kilometroko lasterketa.
Laudioarra bigarren izan zen Beterano A kategorian (35 eta 39 urte bitarteko kirolariena) eta hamahirugarren sailkapen orokorrean. Galderrek lehenengo aldiz zapaldu zuen podiuma hiri lasterketa batean, eta balioetsi egin du egindakoa. Izan ere, lehen bost sailkatuentzat sari ekonomikoak zeuden eta, hori dela medio, maila zegoen korrikalarien artean.
Ibilbideari dagokionez, laudioarrak azaldu du 3,3 kilometrokoa zela, eta hiru aldiz bete behar zela: "Tarte azkarrak eta aldapak zituen. 180 graduko birak ere bazituen eta giroa ona izan zen. Ondo sentitu nintzen eta lasterketa ona egin nuen".
Kasualitatea
Kirol mugarri hori, dena den, zoriaren ondorioa izan da. Berez, Galder Hernandez Bergantiñosek Valentziara jo zuen abenduaren 4an hango maratoian parte hartzeko. Laudio Atletismo Klubeko beste kide batzuekin egin zuen eta bere marka murriztea lortu zuen; 2:44:25.
Horren ostean, eta astebeteko oporrak zituela baliatuta, bere familiaren apartamentura joan zen, Vera Playara. Hirian egonda, irratian entzun zuen lasterketa egingo zela asteburuan eta baloratu zuen izena ematea. Zalantzan egon zen, maratoia egin ostean ez baitzekien nola erantzungo zuen gorputzak, baina, azkenean, lehiatu zen.