Gaur izango da Maite Esquisavel Barrenaren elizkizuna Laudioko Lamuzako San Pedro Parrokian. Laudioarra Cremeneseko Markesa izan zen -lehenengoa eta azkena- eta gaur agurtuko dute herrian, atzo hil baitzen Laudion bertan, nahiz eta hainbat urtez Madrilgo Salamanca auzoan bizi.
Maite Esquisavel: emakume kulturaduna
Maita Esquisavel David Alvarezen idazkaria izan zen, eta bere hirugarren emaztea. 2009an ezkondu ziren eta laudioarrak kargu oso garrantzitsuak hartu zituen Alvarezen enpresetan. Hain zuzen, enpresako presidentetzako kabinetearen buruzagi bilakatu zen.
Edonola ere, ardura horiek bere gain egon baino lehen, Maite Esquisavelek ibilbide luzea egin zuen, 17 urterekin Dublinera jo zuen ingelesa eta literatura ikastera Cambridgeko Unibertsitatean. Pariseko Sorbonan ere egin zituen literaturari lotutako ikasketak. Azkenik, zuzenbidean lizentziatu zen Deustun eta itzulpengintzan aditua zen.
Horrez gain, haur literatutako egilea izan zen, eta Jon y sus amigos del bosque liburu ilustratua idatzi zuen.
Markes titulua, 2009tik
Berez, laudioarra 2009an David Alvarez enpresariarekin ezkondu zelako bilakatu zen aristokrata. Alvarez negozio gizon oso garrantzitsua izan zen -2015ean zendu zen- kanpo zerbitzuak eskaintzen duen Eulen nazioarteko taldearen sortzailea eta burua izan zelako, eta 80.000 langile baino gehiago zituelako konpainian. Hori ez ezik, Vega Sicilia upategiaren jabea ere bazen.
Alvarezek Juan Carlos I. eskutik jaso zuen titulua -adiskideak ziren- eta hain zuzen, errege ohiaren azkenengo erabakien artean egon zen Cremeneseko Markesa bilakatzea.
Wikileaks-ek zabaldutako zenbait dokumenturen arabera, David Alvarez Hazte Oír plataforma, VOX alderdia eta nazioarteko topaketa ultraeskuindarren bultzatzaile ekonomikoa izan zen.