Berezia izan da urteko azken larunbateko azoka. Izan ere, ohiko postuez gain, bestelakoak ere izan dira Aldai plazan. Basalarrinak antolatzen du ekintza, eta bertso saioa egon da eguerdian ere. Horrez gain, Begoña Azkarai Hierro-Olabarria omendu dute, Olariaga baserriko okina. Modu horretan aitortu diote hamarkadetan zehar Laudion zein Okondon ogiak edota txintxortak saltzen hartutako lana.
Begoña Azkarai Hierro-Olabarriari omenaldia
Ekitaldian nabarmendu dutenez, duela 65 urte jaio zen Begoña Azkarai Hierro-Olabarria Baranbioko Lazkano baserrian. Artzaintzari lotuta igaro zituen lehen urteak, familiako bizimodua medio. Ogia egiten, ordea, familiaren kontsumorako hasi zen. Hala azaldu du berak ekitaldian: "Asteburuetan ogia egin eta Laudio eta Okondoko bizilagunak igotzen ziren ogia erostera baserrira; baita garia, artoa zein txintxortak ere. Baina dena ez da ogia egin eta saltzea. Ogiari esker, pertsona zoragarriak ezagutu ditut, eta gaur egun lagun dei ditzaket. Eskerrik asko, Laudio!".
Oroigarri gisa, Fidel Largatxaren egur landu pieza bat oparitu diote baserritarrek, eta txalo zaparrada handi batekin aitortu zein goraipatu dute urte luzez eginiko lana.