Proiektu berri batean murgilduta dago Yogurinha Borova artista laudioarra. Bere helburua 2023ko LGTBQ+ Harrotasunaren egunerako abesti berri bat kaleratzea da, eta proiektua finantzatzeko finantzaketa kolektibo kanpaina bat jarri du abian. Crowdfunding kanpainari esker, abestiaren grabaketaren, bideokliparen eta gainerako material grafikoaren gastuei egin nahi die aurre Yogurinha Borovak.
Honezkero, 2.000 euro baino gehiago bildu ditu artistak, eta otsailaren erdialdera arte egongo da Internet bidez ekarpen ekonomikoak egiteko aukera. Proiektua finantzatu ahal izateko 6.000 euro beharko dituela aurreikusi du Yogurinha Borovak.
Juan Sueirorekin elkarlana
Abestiaren grabaketa Juan Sueiro musika-ekoizlearekin egiteko asmoa azaldu du artista laudioarrak, kanpaina aurkezteko plazaratutako bideoan. Estudio 54 diskoetxeko kidea da Sueiro eta Espainiako Estatuko musika talde entzutetsu askoren abestien atzean egon da urte luzez. Besteak beste, Fangoria eta La Casa Azul bezalako taldeen kantak ekoitzi ditu ekoizle galiziarrak.
Ibilbide luzea aniztasuna aldarrikatzen
Yogurinha Borovak urteak daramatza aniztasuna musikaren bidez aldarrikatzen. Drag artista laudioarrak hamaika proiektu plazaratu ditu LGTBQ+ edukiak gazteenen artean zabaltzeko helburuarekin. Orotariko gaiak landu ditu bere diskografia luzean: lodi-fobia, eraso sexistak, arrazakeria, eskola-jazarpena...
Proiektu musikaletatik haratago ere, bestelako lan artistikoak gauzatu ditu, betiere LGTBQ+ aldarriak presente izanik. Horien artean daude Pirritx, Porrotx eta Marimotots pailazoekin batera prestaturiko Sentipenak Askatu ikuskizuna edota Maria Urcelayrekin batera taularatutako Mari, Meri eta Lari antzerki pieza.