Laudioko Gaztetxearen aldeko elkartasun jaialdiak antolatu dituzte Laudion, Bilbon eta Gasteizen

Aimar Gutierrez Bidarte 2023ko urt. 11a, 16:00
Deskargatu Info Ahotsak :

Istiluak jazo ziren ekainaren 13an Zumalakarregi etorbidean. / Laudioko Gaztetxea

Laudioko Gaztetxearen kaleratzearen ondorio ekonomikoei aurre egiteko elkartasun jaialdiak antolatu dituzte Orbeko Etxean, Zazpi Katu Gaztetxean eta Gasteizko Gaztetxean. Ertzaintzak 'mozal legea' ezarri zien sei gazteri ekainaren 13ko protesten harira, 4.000 euroko isunak guztira.

Laudioko Gaztetxeak eta sortu berria den Defentsa Komunitateak elkartasun jaialdiak antolatu dituzte datozen asteetan Laudioko Orbeko Etxean, Bilboko Zazpi Katu Gaztetxean eta Gasteizko Gaztetxean.

Ekainaren 13an gaztetxearen hustearen aurkako mobilizazioen ondotik Ertzaintzak 'mozal legea' ezarri zien protestan zeuden sei gazteri. Gazte bakoitzak 700 euroko isuna jaso du, 4.000 euro guztira, eta horri aurre egiteko antolatu dituzte kontzertuak.

Lehenengo jaialdia, urtarrilaren 21ean

Orbeko Etxean antolatu dute hiru elkartasun jaialdietatik lehena. Urtarrilaren 21ean izango da hitzordua, 21:00etatik aurrera. Ukabil, Rodeo eta Habemus Papam taldeak arituko dira. Sarrera lau eurokoa izango da, eta bildutako diru guztia isunak ordaintzera bideratuko dute.

Honakoa ez da isundutako gazteen alde Orbeko Etxean antolatzen den lehen jaialdia. Azaroaren 25ean, Laudioko Gazte Egunaren bezperan, Jipis Atomicos, Garena eta Build A Bomb taldeekin antolatu zituzten dirua biltzeko kontzertuak.

Otsailaren 2an eta otsailaren 9an izango dira gainerako hitzorduak, Bilbon eta Gasteizen, hurrenez hurren. Datozen asteetan iragarriko dituzte bi jaialdi horietan arituko diren musika taldeak.

Politika Laudio

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide