Urtarrilaren 21ean, larunbatean, lehiatuko da Laudion Eskolarteko Ziklokros Lasterketa, 11:00etan Ellakuriko kirolgunean. 7 eta 14 urte bitarteko gazteentzako proba da, eta antolatzaileek deia zabaldu dute ahalik eta kirolari gehien batu daitezen.
Julen Olabarrieta Laudioar Txirrindulari Elkarteko kideak azaldu du ez dela beharrezkoa talde batean egotea parte hartzeko. Alegia, baldintza oso gutxi jarri dituzte: izena ematea aldez aurretik hemen (zailtasunik gabe betetzen den Google Forms galdetegi bat da), txirrindula eramatea (mendikoa edo ziklokrosekoa) eta kaskoa erabiltzea. Doakoa da jarduera.
Antolatzaileek erraztasunak eman dituzte izena emateko eta lasterketan parte hartzeko
Oro har, Arabako eskolek (Amurriok, Arabarrak-ek, Aranakok, Forondak, Iturriberok, Laudioarrak, K6-k eta Zuianok) eramaten dituzte euren kideak lasterketa horietara, baina Olabarrietak azpimarratu du "gogoak baino ez direla behar" Ellakuriko proban parte hartzeko.
Irteera autokarabanen aparkalekuan egongo da. Aurrebenjaminek zirkuitu erdia egingo dute, benjaminek behin beteko dute ibilbidea, kimuek hiru aldiz eta haur kategoriakoek sei aldiz.
Antolatzaileen asmoa da gazte ugarik probatzea lasterketa zer den, eta animatzea Laudioar Txirrindularitza Elkartera batzen. Publikoak kafetegi zerbitzua izango du, Laudio Ikastolako ikasleek jarriko baitute barra, ikasbidaia finantzatzeko.